MA'RIFAT DASAR BASA SUNDA
MAKOM ZUHUD
Bismillahirrohmaanirrohiim
Saderek
sadaya dina hanca anu tipayun parantos dibahas maqom anu ka tilu nyaeta maqom
syukur, tah ayeuna urang teraskeun deui kana maqom anu salajengna nyaeta maqom
anu ka opat dina ieu catetan ya’ni maqom zuhud.
Maqom yakin anu kaopatna nyaeta
zuhud. Hartosna henteu kapangaruhan hate ku naon bae anu matak ngaganggu kana
hate sareng pikiran tina eling ka akherat sareng ka Alloh Ta’ala.
Lamun istilah ahli hakekat mah,
ngaran zuhud teh nyaeta teu resep sareng ngabalieur kana haliyah dunya. Ari
ceuk urang sunda mah zuhud teh sok oge dingaranan tapa. Maksudna tapa
tina hawek sareng kokomoan kana dunya nepi ka silih gosok, silih sodok, silih
desek, nepi ka pikiran sareng hate teh pinuh ku kainget sareng ku kacinta kana
dunya, kana kapangkatan, kana pangaruh, sareng anu sanesna anu matak poek kana
hate, anu matak unclang-anclong dina sholat, dina wiridan, dugikeun ka poho bae
ari ka Alloh-na mah. Contona keur sholat inget kana duit anu leungit, kana
pagawean anu can anggeus sareng sajabina.
Tah hate anu kieu, hate anu henteu
salamet ngaranna. Hate anu pinuh ku kokotor pinuh ku rereged dunya,
kagendam ku kahirupan anu teu langgeng, anu antukna loba balangah ka Alloh SWT.
Dawuhan Alloh Ta’ala dina surat
Fathir ayat 5 : Anu Hartosna : “Yeuh sakabeh manusa saenyana jangji Alloh eta
haq . maka poma aranjeun kagendam ( katipu ) ku kahirupan dunya, jeung mangkade
aranjeun kagendam kana inget ka Alloh ku rupa-rupa gendaman. ( tipuan )”
Jadi naon bae anu matak poho ka
Alloh, eta disebutna gendaman, bujukan, gogoda, sareng tipuan. Malah dunya teh
sok loba oge anu nyebutkeun ririwa.ari sababna di dunya teh sok loba kasieun.
Nyaeta: sieun ripuh, sieun susah, sieun fakir, sieun cemar, sieun kalindih ku
batur, sieun…. Padahal dina Al-Qur’an, gusti Alloh parantos masihan tanda ka
para kakasihna,Hartosna : “Heh, eling-eling saenyana para kakasih Alloh mah
tara sieunan sareng tara nalangsaan.”
Lamun urang alim katarajang ku 2
panyakit ieu, nyaeta sieun sareng nalangsaan, nyaeta kedah zuhud, kudu ulah
cinta ka salian ti Alloh. Sabab cinta ka salian ti Alloh sareng lain cinta
karna Alloh, sok ditungtungan ku nalangsa sareng ku……….. Aduuuuh!!
Contona : Cinta kana badan, lamun gering
sok nyebut : “Aduuuh…!!”
Cinta kana pakean, lamun ruksak sok
nyebut : “Aduuuh…!!”
Cinta kana kadudukan, lamun digeser
sok nyebut : “Aduuuuh….!!”
Cinta ka murid, lamun bubar, sok
nyebut : “Aduuuh…..!!”
Cinta ka santri, lamun parindah, sok
nyebut : “Aduuuh…..!!”
Cinta kana amalan, lamun poho teu
ngamal. sok nyebut : “Aduuuuuh….!!
Sareng anu sanesna deui anu matak
kaduhung jadi pikiran
Tah kitu balukarna lamun urang teu daek zuhud.
Hirup jadi loba kaduhung, loba kamelang jeung kasieun
sareng sajabina ti eta.
Sareng zuhud ieu teh salah sahiji
syarat dipikacinta ku Gusti Alloh, saperti dina salah sahiji
Hadist Hasan anu diriwayatkeun ku
Ibnu Majah r.a. :
Hiji pameget ngadeuheus ka K.N
Muhammad saw. bade unjuk tumaros.
Kieu pokna : “Ya
Rosullullah, tuduhkeun ka abdi kana amal anu matak dipikacinta ku Alloh sareng
ku papada jalma.”
Walerna Rosullullah : “Kudu zuhud
anjeun di ieu dunya, pasti anjeun dipikacinta ku Alloh Ta’ala, jeung kudu zuhud
anjeun dina pangaboga jalma, pasti anjeun dipikacinta ku maranehan-nana”
Jadi Rahasiahna lamun hayang
dipikacinta ku Alloh Ta’ala sareng ku papada jalma, teu aya deui anging kudu
zuhud……!!
Zuhud ieu teh jadi ka asup kana elmu
kamasyarakatan.
Lenyepkeun …!! Heh salik…!
Dina Al-Qur’an sareng dina Hadist,
seu-eur pisan katerangan anu marentah kana zuhud. Ku ayana kitu geura prak
laksanakeun, taekan ieu maqom zuhud teh ti mimiti diajar, bisa, sing nepi ka
jadi ahli sareng adat. Dugikeun ka bersih hate anjeun tina cinta ka salian ti
Alloh, sabab moal pol cinta ka Alloh lamun dina hate anjeun aya kacinta ka
salian ti anjeunNa.
Kakara lamun anjeun geus bisa kitu
anjeun jadi hamba Alloh anu sajati, tur amal ibadah anjeun bakal seu-eur
hasilna. Dawuhan Ibnu Mas’ud r.a.:
“ Dua rakaat solatna jalma anu
zuhud, anu ngarti, eta leuwih alus tibatan ibadahna tukang aribadah anu paeh
poso dina ibadahna, tepi ka iraha oge “
Saur Imam Ibnu Athoillah dina
HIKAM-na:
“Henteu saeutik nilai-na amal anu
timbul tina hate anu zuhud, sareng henteu loba nilai-na amal anu timbul tina
hate anu resep kana dunya, sabab nilai-na amal mah henteu tiasa diukur ku
lahir, tapi ku bathin, margi Alloh SWT mah teu ningali lahir”.
Lenyepkeun :
Dina naekan maqom zuhud ieu, anjeun
heh salik, kudu diajar riyadoh, nyaeta ngalatih nafsu ku jalan ngalaksanakeun
rukun suluk.
Ari rukun suluk ieu sadayana aya 4 :
1.Ngurangan barang dahar
2.Ngurangan sare
3.Ngurangan bergaul
4.Ngurangan ngomong, serta nyeueurkeun tafakur.
Sakumaha carios ahli ma’rifat:
“maqom kawalian ku wali abdal di
bagi 4 rukun : (1) Jempe, (2) Uzlah, (3) Lapar, (4) Melek, sareng
ngamahasucikeun ka Zat Anu Maha Luhur”
Sing inget anjeun heh salik, kana
paribahasa ‘ saha nu keyeng tangtu pareng’
Saur Al-Arif billah Syekh Nafis bin
Idris dina kitab Durun Nafis, nyaeta kitab anu ditulad ku ieu buku , kieu: “
Jalma anu suluk, omat ulah mirasa kana carita-an jalma bodo ( anu poek hatena )
anu ngomong kieu “ wah, jaman ayeuna mah moal aya atuh anu hasil kana maqom
kawalian, kusabab jaman oge geus akhir”.
Maka saur Syekh Nafis:’ Carita-an
kitu teh mardud, anu maksudna ditolak. Henteu bener, lantaran timbul tina
hasudna sareng inadna ( nentang )”.
Salajengna saur eta Syekh, “Tapi
lamun eta jalma ngomong kituna teh bari nekadkeun dina hatena ”; maka eta jalma
teh murtad!. Sabab netepkeun lemah ka Gusti Alloh. Sabab ari Alloh Ta’ala mah
Kawasa masihan sareng ngani’matan kawalian dina jaman ayeuna oge, margi Alloh
Ta’ala mah wenang ngadamel mumkin ! Kawalian oge kalebet barang mumkin!”
Lenyepkeun para salik:
Geura prak laksanakeun ieu rukun
suluk anu opat, ti mimiti diajar, bisa, nepi ka ahli. Omat ulah sentak-badakeun
dina ngamalkeun-nana; tapi latihan saeutik-saeutik kalawan tekun sareng
angkeuhan anu kuat. Insya Alloh…kataekan…!
Saur Al-Arif Syekh Ali Al-khowas
r.a, nyaeta guru Sulukna Qutub Syahroni r.a:
“Saha jalma anu istiqomah dina maqom
tobatna, sarta zuhud dunyana, maka bakal kumpul ka eta jalma sadayana maqom
yakin anu sanesna sareng bakal alus tingkah hatena”
MA’RIFAT
ZUHUD
“ Sing saha anu kenal
kadirina, tangtu kenal ka Pangeran-nana” kitu cariosan nana Syekh Abi Yazid
Al-Bistami.
Moal pol kenal ka Alloh lamun dina
hate aya karesep ka salian anjeunNa( henteu zuhud ). Ari salian Alloh,
hakekatna “adamun mahdun, hartosna henteu aya bolokotan nana, ka asup diri
urang. Kitu soteh dina rasa jalmi anu tos pol zuhudna.
Tah, dimana urang geus ngarasa yen
diri urang sareng sakabeh makhluk eta henteu aya dina hakekatna, naon perluna
sareng gunana, make mikacinta kanu henteu aya; kusabab lamun urang awas kana
sajeroeun ieu alam, anu di sebut mukasyafah ka alam mughoyyabat, hartina
ningali ka alam gaib, alam arwah sareng nafsu, alam caang narawang, tanwande
pasti katingali sareng karasa palsuna kahirupan ieu dunya teh.
Kakara didinya urang yakin kana
ayana sareng deukeutna akherat teh sakumaha dawuhan Sayidina Abu Bakar r.a.:
“Lamun anjeun geus yakin ka akherat, pasti katingali akherat teh, eta leuwih
deukeut manan tali sandal anjeun.”
Sabab caang diriI eta leuwih deukeut
manan poekna. Caang mah asal, poek mah cabang….!
Caang mah wujud hakiki, poek mah
wujud majazi. Ari caang eta roh urang, ari poek mah eta jasad urang….! Jasad di
sebutna hurup, Roh di sebutna ma’na….! Jasad di alam Mulki……, Roh di alam
malakut…! Jasad mah di alam Hikmat…, Roh mah di alam Qudrot.!
Bingung nya? Sami abdi oge anu
nulisna bingung ngaos ilmu ieu mah. Nu matak ngan sa eutik jalma anu dugi ka
lulusna kana ngamalkeun elmu ma’rifat mah. Tapi teu kitu upami Gusti Alloh
marengkeun saha nu tiasa nyegah? Urang mah sakadar ngalaksanakeun ikhtiar, da
anu haq marengkeun mah Gusti Allah.
Moal tembong nur-na ieu rohani….,
lamun urang henteu zuhud! Sareng moal kenal ka Alloh…., lamun can ningali kana
nur-na Rohani…..!
Sabab hiji-hijina jalan pikeun kenal
ka Alloh Ta’ala, iwal ti kudu … kenal heula kana rohani,nyaeta diri urang anu
haqiqi, jalaran ari rohani mah eta sadayana oge kenal ( ma’rifat ) ka gusti
Alloh, sakumaha dawuhan nana di qur an, anu hartosna kieu
“Naha kami ieu teh lain pangeran aranjeun…?”
“Jawab sadayana ruh:
“Sumuhun…, gusti teh pangeran jisim abdi”
Tegeskeun ku anjeun heh salik,
Jawaban ruh ieu lain baheula bae…,
tapi ayeuna oge angger kitu.
Jadi roh anjeun mah ayeuna oge,
saban detik oge, kenal…. ( ma’rifat ) ka Gusti Alloh, jalaran hakekat na mah…..
roh ieu aya dina alam Asma Allah.
Lenyepkeun…..!
Dawuhan K.N. Muhammad saw:
“Saenyana nur, dimana geus asup kana
hate, pasti eta hate teh jadi lega, sareng jembar”( Riwayat Al-Baihaqi sareng
Al-Hakim ).
Ari cirina jalmi anu tos kitu…..,
zuhud di dunyana….. ! Dina Hikam Ibnu Athoillah:
Anu hartosna kieu: ”Nur nganyatakeun
terbuka kana alam ma’na sareng alam ghoib, bashiroh ( panon hate )
nganyatakeun pasti”
Jadi iman na oge anu geus ka-asupan
nur mah kana hatena, pasti yakin 100%…!
Ari ieu nur teh disebutna: NUR IMAN,
NUR YAKIN, NUR HIDAYAH, NUR MA’RIFAT, NUR LADUNNI, oge disebut BARIQOH (
gebrayna hate ). Gebrayna hate ieu teh sok di sebut TAJALLI.
Jelas bae tos kitu mah, ma’na
hakekatna ayat anu sok dibahas, dikupas ku ahli ma’rifat, nyaeta:
Hartosna: “Ucapkeun ku anjeun:
“ALLOH”, tuluy tinggalkeun ku anjeun maranehan-nana dina heureuyna”.
Hakekatna
mah didieu teh ucap hate, lain ucap lisan. Ucap hate anu tanpa huruf
tanpa sora,
nyaeta anu
ceuk lisanna mah “Qul Alloh” Lamun ceuk hatena mah nyaeta kitu…!
Tah ieu kahebatan TAJALLI……!
Sakabeh anu ma’rifat, ngalaman kitu
heula …., sabab eta tajalli teh pembuka lawang ma’rifat sareng yakin, sareng
laduni.
Tah dugi kadieu wae heula bahasan
maqom yakin anu ka opat nyaeta maqom zuhud. Kade lepat hartos zuhud didieu
nyaeta rasa hate sanes rasa jasad. Teu saeutik jalma miskin tapi teu zuhud tapi
aya oge jalmi beunghar ku dunya tapi hatena zuhud !
Engke upami masih keneh dipasihan
hirup urang teraskeun kana mqom anu kalima, nyaeta maqom tawekal tea.
&via=stc_network)
0 komentar:
Posting Komentar